പാത്തോളജി

പാത്തോളജി & മൈക്രോബയോളജി വകുപ്പ്

തിരുവനന്തപുരം ഗവൺമെൻ്റ് ഹോമിയോപ്പതിക് മെഡിക്കൽ കോളേജ് & ഹോസ്പിറ്റലിൻ്റെ സ്ഥാപനത്തോടൊപ്പം 1993-ൽ ആരംഭിച്ചതുമുതൽ, പാത്തോളജി ആൻഡ് മൈക്രോബയോളജി വിഭാഗം അവിടുത്തെ അക്കാദമിക് മികവിൻ്റെെ ഒരു പ്രധാന അടിത്തറയായി നിലകൊള്ളുന്നു. കേരള ആരോഗ്യശാസ്ത്ര സർവകലാശാല (KUHS), തൃശൂർ, കൂടാതെ സെൻട്രൽ കൗൺസിൽ ഓഫ് ഹോമിയോപ്പതി (CCH) / നാഷണൽ കമ്മീഷൻ ഫോർ ഹോമിയോപ്പതി (NCH), ന്യൂഡൽഹി എന്നിവയുടെ പാഠ്യപദ്ധതി മാനദണ്ഡങ്ങൾ അനുസരിച്ച് II BHMS വിദ്യാർത്ഥികൾക്ക് സമഗ്രമായ പഠനപരിശീലനം വകുപ്പ് നൽകുന്നു.

രോഗകാരക ഘടകങ്ങളോട് മനുഷ്യശരീരം എങ്ങനെ പ്രതികരിക്കുന്നു എന്നതിനെക്കുറിച്ചുള്ള ശാസ്ത്രീയ അറിവും അതിൻ്റെ ക്ലിനിക്കൽ പ്രാധാന്യവും വിദ്യാർത്ഥികൾക്ക് മനസ്സിലാക്കാൻ സഹായിക്കുന്ന രീതിയിലാണ് പഠനക്രമം രൂപകൽപ്പന ചെയ്തിരിക്കുന്നത്. രോഗലക്ഷണങ്ങളെയും അടയാളങ്ങളെയും ശരിയായി വ്യാഖ്യാനിക്കുകയും, അവയെ പാത്തോളജിക്കൽ കണ്ടെത്തലുകളുമായി പരസ്പരം ബന്ധിപ്പിക്കുകയും, കൃത്യമായ ഹോമിയോപതിക് ഔഷധനിർണയത്തിനായി മിയാസ്മാറ്റിക് (Miasmatic) സമീപനം സമന്വയിപ്പിക്കുകയും ചെയ്യുന്നതിനാണ് പ്രധാന ഊന്നൽ നൽകുന്നത്.രോഗനിർണയം, ക്ലിനിക്കൽ വിലയിരുത്തൽ, രോഗപ്രവചനം, രോഗപ്രതിരോധം, രോഗപരിപാലനം എന്നിവയ്ക്കാവശ്യമായ അടിസ്ഥാന വൈദഗ്ധ്യങ്ങൾ കൈവരിച്ച പ്രാവീണ്യമുള്ള ഹോമിയോപ്പതിക് ചികിത്സകരെ വളർത്തിയെടുക്കുക എന്നതാണ് വകുപ്പിൻ്റെ ലക്ഷ്യം.

വകുപ്പിൻ്റെ പ്രധാന സവിശേഷതകൾ

വിശാലമായ സൗകര്യങ്ങൾ :

195 ചതുരശ്ര മീറ്റർ വിസ്തൃതിയിൽ പ്രവർത്തിക്കുന്ന വകുപ്പിൽ മൂന്ന് അധ്യാപക മുറികൾ, സമ്പന്നമായ ലൈബ്രറി, മ്യൂസിയവും ഡെമോൺസ്ട്രേഷൻ ഹാളും, പൂർണ്ണസജ്ജമായ ലബോറട്ടറിയും ഉൾപ്പെടുന്നു.

വിദ്യാഭ്യാസ മ്യൂസിയം :

പാത്തോളജിക്കൽ സ്പെസിമനുകൾ, ഹിസ്റ്റോപാത്തോളജിക്കൽ സ്ലൈഡുകൾ, ചാർട്ടുകൾ, അനാട്ടോമിക്കൽ മോഡലുകൾ, ലാമിനേറ്റ് ചെയ്ത ദൃശ്യസഹായങ്ങൾ എന്നിവയുടെ സമഗ്ര ശേഖരം വിദ്യാർത്ഥികൾക്ക് അനുഭവാധിഷ്ഠിത പഠനം ഉറപ്പാക്കുന്നു.

ആധുനിക ലബോറട്ടറി :

പാത്തോളജി, മൈക്രോബയോളജി വിഷയങ്ങളിലെ പ്രായോഗിക ക്ലാസുകൾക്കാവശ്യമായ എല്ലാ അടിസ്ഥാന ഉപകരണങ്ങളും വിശാലമായ പരിശീലന സൗകര്യങ്ങളും ലബോറട്ടറിയിൽ ലഭ്യമാണ്.

സമ്പന്നമായ ലൈബ്രറി :

പാത്തോളജി, മൈക്രോബയോളജി വിഷയങ്ങളിലെ ഏറ്റവും പുതിയ പതിപ്പുകൾ ഉൾപ്പെടെ ആകെ 252 പുസ്തകങ്ങൾ അടങ്ങിയ ലൈബ്രറി വിദ്യാർത്ഥികളുടെയും അധ്യാപകരുടെയും അക്കാദമികവും ഗവേഷണപരവുമായ ആവശ്യങ്ങൾ നിറവേറ്റുന്നു.

പരിസ്ഥിതി സൗഹൃദ പ്രവർത്തനങ്ങൾ :

ജൈവ-മെഡിക്കൽ മാലിന്യ സംസ്കരണത്തിനായി സുരക്ഷാ-പരിസ്ഥിതി മാനദണ്ഡങ്ങൾ പാലിച്ചുകൊണ്ടുള്ള കാര്യക്ഷമമായ സംവിധാനം വകുപ്പിൽ നടപ്പിലാക്കിയിട്ടുണ്ട്.

നൽകുന്ന സേവനങ്ങൾ

പ്രായോഗിക പരിശീലനം : ഹീമറ്റോളജി, മൈക്രോബയോളജി എന്നീ വിഷയങ്ങളിലെ ലബോറട്ടറി സാങ്കേതികവിദ്യകളിൽ നേരിട്ടുള്ള പരിശീലനം നൽകി, ക്ലിനിക്കൽ പ്രവർത്തനങ്ങൾക്ക് ആവശ്യമായ അടിസ്ഥാന ലബോറട്ടറി നൈപുണ്യങ്ങൾ വിദ്യാർത്ഥികൾക്ക് കൈവരിക്കാൻ സഹായിക്കുന്നു.