കമ്മ്യൂണിറ്റി മെഡിസിൻ വകുപ്പ് മൂന്നാം വർഷവും അന്തിമ വർഷവും ബി.എച്ച്.എം.എസ്. വിദ്യാർത്ഥികൾക്ക് പഠിപ്പിക്കുന്ന വിഷയമാണ്. പഠനപ്രക്രിയയുടെ ഭാഗമായി സെമിനാറുകൾ, ഗ്രൂപ്പ് ചർച്ചകൾ, പ്രദർശനങ്ങൾ (Demonstrations), പ്രായോഗിക പരിശീലനങ്ങൾ, പൊതുജനാരോഗ്യ സ്ഥാപനങ്ങളിലേക്കുള്ള സന്ദർശനങ്ങൾ, സമൂഹധിഷ്ഠിത പരിശീലനങ്ങൾ എന്നിവ നടത്തിവരുന്നു. ഇതിൽ ഫീൽഡ് സന്ദർശനങ്ങളും കുടുംബാരോഗ്യ സർവേകളും ഉൾപ്പെടുന്നു.

ഇൻ്റേൺമാർക്ക് രോഗനിർവഹണത്തിലും രോഗപ്രതിരോധ പ്രവർത്തനങ്ങളിലും വകുപ്പ് പരിശീലനം നൽകുന്നു. സാങ്ക്രമിക രോഗങ്ങളെക്കുറിച്ചുള്ള വിവരശേഖരണം, പൊതുജനാരോഗ്യ പ്രാധാന്യമുള്ള വിഷയങ്ങളിൽ അസൈൻമെന്റുകളും ഡിസർട്ടേഷൻ പഠനങ്ങളും നടത്തുന്നത് ഇൻ്റേൺ പരിശീലനത്തിൻ്റെ പ്രധാന ഘടകങ്ങളാണ്.

അധ്യയന പ്രവർത്തനങ്ങൾക്ക് പുറമെ, തിരുവനന്തപുരം ജില്ലയിലും പരിസര പ്രദേശങ്ങളിലും വിവിധ പൊതുജനാരോഗ്യ പ്രവർത്തനങ്ങളിൽ വകുപ്പ് സജീവമായി പങ്കാളിയാകുന്നു. റസിഡൻ്റ്സ് അസോസിയേഷനുകൾ, തദ്ദേശ സ്വയംഭരണ സ്ഥാപനങ്ങൾ, വിവിധ സന്നദ്ധ സംഘടനകൾ (NGOs) എന്നിവയുടെ സഹകരണത്തോടെ മെഡിക്കൽ ക്യാമ്പുകൾ സംഘടിപ്പിക്കുന്നു.വകുപ്പ് അധ്യാപനം, ക്ലിനിക്കൽ സേവനം, ഗവേഷണ പ്രവർത്തനങ്ങൾ എന്നിവയിലും സജീവമായി പ്രവർത്തിച്ചുവരുന്നു. പകർച്ചവ്യാധി സാഹചര്യങ്ങളിലും ദുർബലരും പിന്നാക്ക വിഭാഗങ്ങളുമായ ജനവിഭാഗങ്ങൾക്കായും പ്രത്യേക ആരോഗ്യ ക്യാമ്പുകൾ സംഘടിപ്പിക്കുന്നു.

കേരള സംസ്ഥാന ഹോമിയോപ്പതി വകുപ്പുമായി സഹകരിച്ച് വിവിധ പൊതുജനാരോഗ്യ പ്രവർത്തനങ്ങളിൽ വകുപ്പ് അക്കാദമിക് പിന്തുണ നൽകുകയും വിവിധ സർവേകളിൽ വിവരശേഖരണത്തിനായി സന്നദ്ധപ്രവർത്തകരെ ലഭ്യമാക്കുകയും ചെയ്യുന്നു. ഉദാഹരണമായി RAECH, ബാല്യ തുടങ്ങിയ പദ്ധതികളിൽ വകുപ്പ് സജീവ പങ്കാളിത്തം വഹിക്കുന്നു. കൂടാതെ, വിവിധ സ്കൂളുകളിലും കോളേജുകളിലും ആരോഗ്യ വിദ്യാഭ്യാസ ക്ലാസുകൾ സംഘടിപ്പിച്ച് ആരോഗ്യ അവബോധം വളർത്തുന്നതിനും വകുപ്പ് പ്രവർത്തിക്കുന്നു.